EspazoCoop promove unha aplicación dixital de xestión para mellorar as Casas do Maior

EspazoCoop vén traballando na elaboración dunha ferramenta dixital que facilite a xestión documental do traballo diario das Casas do Maior (centros para persoas maiores) xestionados por cooperativas de traballo asociado. Faino co apoio e no marco da convocatoria de programas da Rede Eusumo que financian actividades de o fomento do cooperativismo, e no marco do proxecto ES- Factory: Rede de Aceleradoras de economía social para impulsar e consolidar empresas en novas actividades emerxentes de Galicia e o Norte de Portugal.

Esta iniciativa que se atopa no Sector da Economía dos Coidados e da Economía Prateada, integra aspectos de xeración de novo coñecemento e consolidación de proxectos de Economía Social, e busca acadar unha mellora dos procesos de xestión das cooperativas que están a xestionar Casas do Maior a través da aplicación de novas tecnoloxías e intelixencia artificial.

A Unión traballou no último ano no deseño, implantación e testaxe dunha ferramenta dixital que facilite o traballo diario das socias traballadoras das Casas de maiores, xestionadas por cooperativas de traballo asociado, diríxese ao Colectivo Colaxe da Costa da Morte, composto por 21 Casas do Maior, e 10 cooperativas, neste momento. Como obxectivos tenciona:

• Simplificar e automatizar o rexistro diario, mantendo a sinxeleza do sistema actual
• Xerar automaticamente os anexos oficiais esixidos pola Xunta de Galicia
• Axilizar o proceso de sinatura e validación, reducindo erros e tempo de tramitación
• Garantir a seguridade e confidencialidade dos datos persoais das persoas usuarios do servizo de coidados

A mellora do funcionamento destas cooperativas para propiciar a súa consolidación, verase beneficiada coa implantación desta ferramenta para aspectos como: facilitar a toma de decisións colectivas con información actualizada, reforzar a transparencia interna, optimizar a planificación de recursos humanos, reducir tempos administrativos, mellorar a eficiencia económica e mesmo afortalar con todo o anterior a gobernanza democrática e a sostibilidade da cooperativa.

A aplicación dixital está a pasar unha fase de probas, testaxe, e capacitación das socias traballadoras das Casas do Maior no seu uso, da que poderán xurdir adaptacións ou melloras en función das necesidades trala implantación do proxecto piloto, tamén con vistas a ser replicable por outras Casas do Maior.

A iniciativa ademais, ten proxectado unha presentación nos vindeiros meses para difundir e facer público este recurso para o sector cooperativo e os coidados.

Esta iniciativa enmárcase:

– As accións realizadas baixo o proxecto 0259_ES_Factory_1_E están cofinanciadas polo Fondo Europeo de Desenvolvemento Rexional (FEDER) a través do programa Interreg VI A España – Portugal (POCTEP) 2021-2027, que promove proxectos de cooperación transfronteiriza co apoio da Unión Europea.

– Programa da Rede Eusumo, que é unha rede de colaboración para o fomento do cooperativismo impulsada pola Xunta de Galicia, Consellería de Emprego, Comercio e Emigración, e co financiamento do Ministerio de Traballo e Economía Social do Goberno de España.