Dende a Consellería de Economía, Emprego e Industria chéganos a seguinte información sobre o programa formativo MEDRANDO XUNTAS :

A economía social é un dos motores que contribúen a construír un mundo máis xusto e inclusivo. Un dos feitos que o corroboran é que entre os seus valores fundacionais se atopa a promoción da igualdade entre mulleres e homes.

Por iso, a Secretaría Xeral de Emprego pon en marcha a segunda edición do programa formativo gratuíto Medrando Xuntas, iniciativa enmarcada dentro do programa Emprega en feminino, que promociona o talento feminino nas entidades de economía social. Medrando Xuntas está dirixido a todas as mulleres de entidades de economía social, ben sexan socias e/ou traballadoras, responsables de dirección e/ou de goberno.

O programa conta con dous itinerarios diferentes, un para mulleres con responsabilidades de goberno e dirección e outro para socias e traballadoras. En ambos casos os contidos están organizados en áreas temáticas vinculadas á xestión das organizacións e ás habilidades persoais, adaptados aos diferentes perfís das destinatarias.

Ademais, como novidade incorporarase un foro participativo coas alumnas de ambas as dúas promocións, un espazo de conversa sobre os retos, desafíos e oportunidades que as mulleres teñen no mundo da economía social e as ferramentas e estratexias para aproveitalas, que terá lugar no último trimestre do ano.

Esta iniciativa resulta de especial interese para todas as organizacións galegas da economía social.

Toda a información relativa a ambas as dúas formacións: docentes, programa completo, horarios, etc. podes consultala nas seguintes ligazóns: curso directivas e curso socias.

As inscricións poden realizarse a través dos formularios web (para directivas e socias), no enderezo electrónico medrandoxuntas.emprego@xunta.gal ou no teléfono 605 545 606. O prazo para inscribirse remata o 15 de xullo de 2018.

Descarga aquí os folletos do programa:

Folleto para socias e traballadoras

Folleto para directivas

CONTAMOS CON VÓS PARA FACER MEDRAR ENTRE TODAS A ECONOMÍA SOCIAL EN GALICIA!

Secretaría Xeral de Emprego da Xunta de Galicia​