Axudas | Bono Consolida Economía Social 2026

A Xunta convocou as axudas para a consolidación e impulso das entidades da economía social : Bono Consolida 2026.

O Diario Oficial de Galicia publicou a convocatoria do Bono Consolida Economía Social, trátase de axudas para o apoio e a consolidación das entidades da economía social de Galicia e para reforzar a súa presenza no tecido económico, con especial incidencia na transformación dixital e na mellora da eficiencia enerxética, contribuíndo ao impulso da súa actividade económica, incrementando a súa competitividade e, en definitiva, mantendo empregos de calidade.

Neste sentido, poden ser beneficiarias destes apoios sociedades cooperativas e laborais, empresas de inserción e centros especiais de emprego que estean rexistrados e acrediten unha antigüidade mínima de 42 meses.

As achegas serán de ata 30.000 euros por entidade e a intensidade da axuda do 80% do custo subvencionable. Entre outras actuacións con elas fináncianse, investimentos realizados entre o 1 de novembro de 2025 e o 30 de outubro de 2026 en:

equipamento informático
software e páxinas web
márketing
eficiencia enerxética
adquisición de equipamento
reforma do centro de traballo
mobiliario
obtención de certificacións de calidade
desenvolvemento da imaxe corporativa da entidade
plan de protección de datos
elementos de transporte
formación para socias de alta no réxime de traballo autónomo (Reta)

Presentación de solicitudes: o prazo de presentación de solicitudes abrirá o 10 de febreiro de 2026 ás 9 h. e prolongarase ata o 10 de abril de 2026 ás 20 h.

Ligazón á orde no DOG: neste enlace

As solicitudes presentaranse obrigatoriamente por medios electrónicos a través do formulario normalizado (anexo I) dispoñible na sede electrónica da Xunta de Galicia.