O Concello de Santiago e EspazoCoop fortalecen o cooperativismo no seu ano clave

• A alcaldesa de Santiago e a concelleira de Dereitos e Servizos sociais, Promoción Económica e Xuventude visitaron a nova sede de EspazoCoop.
• Unha vez rematada esta visita, ambas dúas entidades mantiveron unha xuntanza.

A Unión de Cooperativas EspazoCoop recibiu hoxe a visita da alcaldesa de Santiago de Compostela, Goretti Sanmartín, e da concelleira de Dereitos e Servizos Sociais, Promoción Económica e Xuventude, María Rozas. O encontro serviu para poñer en valor a traxectoria e o traballo de EspazoCoop no fortalecemento do cooperativismo e a economía social, especialmente neste 2025, declarado Ano Internacional das Cooperativas. Unha vez rematada a visita, representantes de EspazoCoop mantiveron unha xuntanza coa concelleira do Concello de Santiago para analizar e propoñer actividades e accións para este ano.

O compromiso de EspazoCoop co cooperativismo e a economía social

EspazoCoop leva anos traballando en colaboración co Concello de Santiago para impulsar o cooperativismo como ferramenta de desenvolvemento económico e social. A través de múltiples iniciativas, ambas as entidades teñen favorecido a creación e consolidación de cooperativas, promovendo un ecosistema máis sustentable e baseado nos valores da economía social.

Durante esta xuntanza, as representantes de EspazoCoop compartiron coa concelleira a importancia de seguir fortalecendo o apoio ao cooperativismo, especialmente neste 2025, Ano Internacional das Cooperativas. No encontro, abordáronse os retos actuais do sector, así como novas oportunidades para fomentar a creación de proxectos cooperativos e consolidar os existentes.

Pola súa banda, a alcaldesa e a tenenta de alcaldesa reiteraron a vontade do Goberno de seguir colaborando coas entidades de economía social, un dos eixos vertebradores da Axenda Urbana 2030, especialmente neste 2025 no que se celebra o Ano Internacional das Cooperativas. O Concello de Santiago, a través da Concellaría de Promoción Económica, tén en marcha diversas accións de promoción, visibilización e apoio á economía social e ao cooperativismo, como as subvencións ás empresas de economía social.

2025, un ano clave para o cooperativismo en Santiago

No marco deste ano conmemorativo, EspazoCoop continúa desenvolvendo accións de sensibilización, formación e acompañamento, contribuíndo á visibilización do cooperativismo como unha alternativa sólida e sustentable. Entre as liñas de traballo destacan:

• A formación e asesoramento a cooperativas, facilitando coñecementos especializados e recursos para fortalecer os seus proxectos.
• A promoción do cooperativismo entre persoas emprendedoras, achegando información e apoio para facilitar o acceso a este modelo económico.
• A dinamización de actividades de difusión e sensibilización, que buscan achegar á cidadanía os valores e beneficios do cooperativismo como ferramenta de transformación social.

Unha economía máis social e sustentable para Santiago

EspazoCoop representa a máis de 270 cooperativas galegas que promoven unha economía baseada na equidade, a participación e a sustentabilidade. A entidade segue traballando para consolidar un ecosistema emprendedor cooperativo en Santiago e en Galicia, favorecendo a creación de proxectos viables con impacto positivo na sociedade.

A xutanza concluíu cun chamamento a continuar reforzando a colaboración entre institucións e entidades da economía social, garantindo o acceso a oportunidades para todas as persoas e promovendo o cooperativismo como un motor clave para o desenvolvemento económico e social.

Neste sentido, destaca a nova sede de EspazoCoop, un espazo compartido no que tamén están presentes EAPN Galicia (Rede Europea contra a Pobreza e a Exclusión Social), a Coordinadora Galega de ONG para o Desenvolvemento, Fiare Banca Ética e Coop57. Este espazo no que conxuntamente se representan case 800 entidades (empresas, asociacións e colectivos) simboliza unha nova forma de traballar en rede, onde a cooperación e a suma de esforzos permiten avanzar cara a unha sociedade máis xusta e equitativa.

Sobre EspazoCoop

A Unión de Cooperativas Espazocoop é unha entidade multisectorial de carácter empresarial, configurada como asociación sen ánimo de lucro, de ámbito galego, integrada por cooperativas de distintas clases, inspirada nos principios cooperativos e os seus valores e que ten como obxectivo: agrupar, representar, impulsar, fomentar a intercooperación e defender os intereses das súas cooperativas socias e das persoas que as constitúen, así como a divulgación, fomento e consolidación do cooperativismo, como ferramenta de desenvolvemento socioeconómico, no marco da economía social e solidaria.