O cooperativismo de consumo preséntase en Sober como vía para impulsar as comunidades enerxéticas no rural
Durante a xornada celebrada en Sober (Lugo) o día 8 de outubro abordáronse os retos e oportunidades das comunidades de enerxía renovables e o papel do cooperativismo de consumo como ferramenta para promover formas de organización colectiva arredor da enerxía e contribuír á creación de Comunidades de Enerxía Renovable no medio rural.
O MOOC “Acción colectiva para a transición enerxética” presentado é unha formación en liña, gratuíta e aberta que recolle os coñecementos e aprendizaxes xerados en EC4URAL.
No evento participaron representantes de tres dos municipios adscritos ao piloto de EC4RURAL en Galicia: Sober, Moeche e O Rosal.
O cooperativismo de consumo pode converterse nunha ferramenta para promover novas formas de organización colectiva arredor da enerxía e contribuír á creación de Comunidades de Enerxía Renovable no medio rural. Esta foi unha das cuestións abordadas en Sober durante a xornada “Cooperativismo de consumo e Comunidades Enerxéticas”, organizada no marco do proxecto europeo EC4RURAL, organizada por EspazoCoop, en colaboración cos socios Fundación Juana de Vega e a FEGAMP (Federación Galega de Municipios e Provincias), e co apoio da Rede Eusumo, no marco das actividades de promoción e impulso do cooperativismo, sectores específicos da economía social (enerxías renovables e transición enerxética).
O encontro, celebrado no espazo Guardabosques de cooperativa Ecoo, en Donelle (Gundivós), reuniu a máis dunha trintena de representantes do ámbito do cooperativismo de consumo (enerxía e vivenda en cesión de uso), das comunidades enerxéticas, das administracións públicas e de persoas interesadas na transición enerxética para compartir experiencias e analizar as posibilidades de impulsar procesos colectivos desde o territorio.
O programa incluíu relatorios sobre a situación do cooperativismo de consumo e a promoción das Comunidades de Enerxía Renovable, así como unha mesa de análise dos principais retos e oportunidades relacionados con trámites administrativos, financiamento, inclusión social e escalabilidade. Neste sentido, Jose Antonio Eiras (Nosa Enerxía S. Coop. Galega e membro do Consello Reitor de EspazoCoop) contextualizou a situación e tendencias do cooperativismo de consumo en Galicia, e Almudena Fiunte, técnica de EC4RURAL vinculada á Universidade de Vigo, fixo un repaso do traballo realizado desde setembro de 2023 e expuxo as principais aprendizaxes dunha metodoloxía baseada nun enfoque multidimensional e multiactor, que combina cidadanía enerxética, liderado municipal, participación e apoio técnico continuado.
A xornada permitiu tamén coñecer casos reais e aprendizaxes sobre comunidades enerxéticas, cooperativas de consumo e innovación social, con experiencias de Galicia e de Andalucía, con especial atención á vivenda en cesión de uso. Entre a ducia de relatores, destacou a presenza de representantes de tres dos municipios adscritos a EC4URAL como son O Rosal, Moeche e Sober para contar a súa experiencia no marco desta iniciativa pioneira en Galicia.
O novo MOOC de EC4RURAL
Un dos momentos centrais da xornada foi a presentación das aprendizaxes de EC4RURAL e o lanzamento dunha nova formación en formato MOOC (Massive Open Online Course) baixo o título “Acción colectiva para a transición enerxética”, dispoñible en galego e e inglés na plataforma de teleformación web de EspazoCoop. Este curso online, libre e en aberto ten como finalidade poñer a disposición da cidadanía, e de calquera persoa interesada, o coñecemento para comprender e impulsar procesos colectivos relacionados coa transición enerxética.
O lanzamento deste MOOC sumáse aos cursos online promovidos no marco de EC4RURAL, e que xa suman seis edicións consecutivas, así como á microcredencial impartida pola Universidade de Vigo. “A formación, a capacitación e a transferencia de coñecemento son elementos necesarios para favorecer a participación das comunidades rurais na transición cara a modelos enerxéticos máis limpos e participativos”, sinalaron desde o consorcio.
Sober retoma o proceso para crear a súa comunidade enerxética
A celebración da xornada en Sober permitiu ademais poñer o foco no proceso iniciado polo municipio para a constitución da súa propia Comunidade de Enerxía Renovable. Sober é un dos 22 municipios galegos adscritos ao piloto galego de EC4RURAL. Durante o peche institucional, o alcalde, Luis Fernández Guitián, avanzou a intención do concello de reactivar o proceso xa que o municipio conta cun estudo técnico elaborado no marco de EC4RURAL.
Un espazo para compartir experiencias
Tras a presentación da nova formación, a xornada incluíu un debate aberto, permitindo ás persoas participantes compartir reflexións e aprendizaxes sobre os diferentes modelos de organización colectiva e as posibilidades de colaboración entre cooperativas, comunidades enerxéticas, administracións e cidadanía.
No peche institucional tamén participou Marta Mariño Regueiro, directora xeral de Traballo Autónomo e Economía Social, e finalizou cun xantar compartido no propio espazo Guardabosques.
—
Esta xornada enmárcase no programa de EC4RURAL para favorecer a transferencia de coñecemento e promover a transición cara a unha enerxía limpa nas zonas rurais, fortalecendo a participación cidadá, a formación e a cooperación entre administracións, comunidades rurais e outros actores locais, e nas actividades de promoción e impulso do cooperativismo da Rede Eusumo.
—
Leave A Comment