EspazoCoop e o Concello da Coruña reúnense para impulsar actividades de apoio ao cooperativismo

Representantes da Unión de Cooperativas EspazoCoop mantiveron unha xuntanza co Concello da Coruña para abordar a programación de actividades no marco do Convenio de colaboración deste ano. Na reunión participaron Diana Sobral, Concelleira de Emprego, Comercio e Mercados, e Mª del Carmen García Méndez e Mar Pernas Márquez, por parte de EspazoCoop.

EspazoCoop e o Concello da Coruña desenvolven convenios de colaboración desde o seu inicio, xa que lle deu continuidade ao que se viña realizando coa Unión de Cooperativas de Traballo Asociado-Ugacota. Para este ano, o convenio conta cun orzamento asignado de 15.000 euros, destinados a impulsar diversas accións de apoio ao cooperativismo e ao emprendemento. Un dos puntos centrais do encontro foi a posibilidade de contribuír á dinamización do espazo Accede Papagaio, unha liña estratéxica do Concello. EspazoCoop vén colaborando no desenvolvemento de actividades e encontros neste espazo e manifesta a súa disposición para seguir achegando iniciativas a través da programación prevista para este ano.

Entre as actividades contempladas atópanse:

• “EspazoCoop Acompaña”, un programa de acompañamento a proxectos de nova creación ou en fase de consolidación.
• Encontro networking cooperativo, que se desenvolverá no espazo Accede Papagaio.
• Dous roteiros cooperativos para centros de ensino, nos que o alumnado poderá visitar tres cooperativas da cidade e coñecer de preto o seu funcionamento.

Con esta reunión, EspazoCoop e o Concello da Coruña reforzan o seu compromiso co impulso do cooperativismo como modelo de desenvolvemento económico e social sostible na cidade.

Sobre EspazoCoop

A Unión de Cooperativas Espazocoop é unha entidade multisectorial de carácter empresarial, configurada como asociación sen ánimo de lucro, de ámbito galego, integrada por cooperativas de distintas clases, inspirada nos principios cooperativos e os seus valores e que ten como obxectivo: agrupar, representar, impulsar, fomentar a intercooperación e defender os intereses das súas cooperativas socias e das persoas que as constitúen, así como a divulgación, fomento e consolidación do cooperativismo, como ferramenta de desenvolvemento socioeconómico, no marco da economía social e solidaria.