Axudas do Programa Aprol Economía Social 2025

 

 

 

O Diario Oficial de Galicia publica hoxe a convocatoria de 2025 da Consellería de Emprego, Comercio e Emigración para fomentar o emprego e a mellora da competitividade nas cooperativas e sociedades laborais. Cun orzamento de 5 millóns de euros, prevese que o programa Aprol Economía Social beneficie unhas 170 entidades e promova a incorporación de 325 persoas socias, consolidando un ecosistema económico de crecemento sustentable que aposta polo emprendemento e polo emprego de calidade, ao tempo que contribúe a vertebrar o territorio e a fixar poboación no rural.

O programa —cuxo prazo de presentación estará aberto desde o 17 de febreiro ata o 16 de setembro de 2025— conta con dúas liñas compatibles entre si:

  • a primeira con axudas directas a cooperativas e sociedades laborais para que incorporen, sobre todo, persoas desempregadas;
  • e a segunda da que se pode beneficiar quen entre como socio ou traballador indefinido a unha destas entidades ou ben se incorpore tras iniciar a súa actividade por conta propia. Neste último caso, os apoios son compatibles co resto de liñas de impulso ao emprendemento da Consellería de Emprego, Comercio e Emigración.

Como novidade, nesta nova convocatoria a Xunta eleva dos dous aos tres anos o período de permanencia como cooperativa ou sociedade laboral requirido ás entidades beneficiarias, co gallo de asegurar no tempo o seu beneficio no eido do traballo por conta propia. Coa finalidade de consolidar o emprego de calidade, deberase manter tamén durante tres anos o incremento do emprego fixo e do número de persoas socias traballadoras indefinidas comprometido nas solicitudes presentadas e aprobadas.

Detalles do programa Aprol Economía Social 2025

A contía básica da axuda en cada liña ascende a 6.000 euros. No caso da primeira, poden solicitala cooperativas e sociedades laborais que sumen socios ou traballadores con carácter indefinido, sendo as beneficiarias finais as persoas desempregadas socias a proba, traballadoras a tempo completo ou temporais que se incorporan.

Mentres, o segundo programa diríxese ás persoas que accedan á condición de socias dunha cooperativa ou dunha sociedade laboral con carácter indefinido co obxecto de facilitar a súa achega ao capital social e reforzar o emprendemento no eido da economía social, sempre que estivesen previamente desempregadas, fosen socias a proba nas entidades ás que se incorporan, estivesen asalariadas nelas ou noutras empresas que logo se transforman en cooperativa ou sociedade laboral. Tamén poderán ser beneficiarias as persoas que, sendo desempregadas e inscritas como demandantes de emprego, emprendan unha actividade por conta propia e se incorporen nunha cooperativa como socias en réxime de exclusividade. En ambas liñas, a orde contempla incrementos da axuda acumulables entre si do 25% se as beneficiarias finais son mulleres, persoas con discapacidade, maiores de 45 anos, emigrantes retornadas ou trans. Tamén se as entidades teñen a sede en contornas rurais, se son cooperativas xuvenís ou de nova creación que conten con catro ou máis socios.

 

Finalidade do Programa Aprol Economía Social 

Fomentar a incorporación de persoas desempregadas e persoas traballadoras temporais a cooperativas e sociedades laborais. Para elo establecéronse dous Programas de axudas:

  • Programa I: Fomento de emprego en cooperativas e sociedades laborais.
  • Programa II: Fomento do acceso á condición de persoa socia.

PROGRAMA I, Poderán acollerse a estes incentivos as cooperativas e sociedades laborais que incorporen persoas socias traballadoras ou de traballo, en centros de traballo situados na Comunidade Autónoma de Galicia, con carácter indefinido ou a proba.

  • De persoas desempregadas.
  • De persoas vinculadas á cooperativa ou sociedade laboral por un contrato de traballo temporal.
  • De persoas socias a proba.
  • De persoas asalariadas dunha empresa que se transforme en cooperativa ou sociedade laboral, sempre que non fosen socias da empresa transformada.

A incorporación poderá ser a xornada completa ou a tempo parcial.

PROGRAMA II, Poderían acollerse a este programa as persoas que accedan á condición de persoa socia traballadora ou de traballo dunha cooperativa ou sociedade laboral con carácter indefinido, a través do financiamento das súas achegas económicas ao capital social, que desenvolvan a súa actividade nun centro de traballo situado en Galicia e que, no momento da súa incorporación, sexan:

  • Persoas desempregadas.
  • Persoas socias a proba da cooperativa á cal se incorporan.
  • Persoas asalariadas da cooperativa ou sociedade laboral á cal se incorporan.
  • Persoas asalariadas dunha empresa que se transforme nunha cooperativa ou sociedade laboral, sempre que non teñan a condición de socias da empresa transformada.
  • Persoas socias traballadoras ou de traballo dunha cooperativa ou sociedade laboral a tempo parcial que accedan á mesma condición a tempo completo.

Entidades beneficiarias

  • As cooperativas e sociedades laborais para as actuacións do programa I.
  • Persoas desempregadas, socias ou traballadoras de cooperativas ou sociedades laborais ou doutras empresas que se transformen nestas, para as actuacións do programa II.

Execución das accións

O período de execución é : Desde o 1 de outubro de 2024 ata o 30 de setembro de 2025.

Prazo de solicitudes

O prazo para presentar solicitudes estará aberto dende o 17 de febreiro ata o 16 de setembro de 2025,  ou ata esgotamento de crédito.

Lembrade

Dende a Unión de Cooperativas EspazoCoop prestamos asesoramento e orientación na  tramitación destas axudas.

Estamos á vosa disposición para realizar servizos de acompañamento de xeito gratuíto na posta en marcha de proxectos de empresa en réxime cooperativo.