O Concello de Santiago resolveu as axudas a empresas da Economía Social: as cooperativas as máis beneficiarias
A Concellaría de Dereitos e Servizos Sociais do Concello de Santiago de Compostela vén de resolver a convocatoria de axudas destinadas a apoiar as empresas de economía social, cun total de 29 entidades beneficiarias que recibirán preto de 115.000 euros no seu conxunto.
As axudas convocáronse en setembro do pasado ano coa finalidade de contribuír á consolidación e desenvolvemento do tecido da economía social no Concello apoiando ás empresas deste sector: cooperativas, sociedades laborais, centros especiais de emprego ou empresas de inserción, entre outras, mediante axudas ao gasto corrente no que incorren para realizar a súa actividade empresarial.
Poñendo o foco no ecosistema da economía social co que conta a capital galega
Na convocatoria resultaron beneficiarias 29 entidades, 7 máis que na anterior convocatoria. Volve medrar tamén o orzamento total destinado ás axudas, que se achega aos 115.000 euros. Son 5.000 euros máis que na pasada convocatoria, e 28.000 euros máis que na convocatoria de 2023.
As entidades beneficiarias atenden a diferentes modelos de economía social e tamén a diferentes sectores produtivos, destacando un importante número de cooperativas do concello que fan parte da Unión de Cooperativas, 21 cooperativas recibirán axuda, entre outras, Flying Fun, Asitecno, Miraxe, Cidadanía, Feitoría Verde, Lirio Media, Urdime, Almazen de Yoga, Rostros y Más, Maos Innovación Social, Culturactiva, Salgueiriños de Consumo, 7H, Nave de Lata, Illa Bufarda, Arabías, Sacauntos, Rayados, Comunidade Creativa, Abeluria e Númax.
EspazoCoop aposta por afianzar os apoios públicos para o sector cooperativo
EspazoCoop no seu labor de representación do cooperativismo e de influencia política celebra estas liñas de axudas, e aposta por afianzar as políticas municipais de fomento da economía social, como vén realizando nos últimos anos en colaboración co Concello de Santiago de Compostela, tanto para a elaboración e mellora das convocatorias como para a divulgación das mesmas entre empresas cooperativas do concello.
O labor de incidencia política de EspazoCoop favorece por tanto o ecosistema do tecido da economía social, especialmente o cooperativo, de Santiago de Compostela.
