EspazoCoop reúnese con Ana Pontón para achegar as necesidades do cooperativismo galego
O Consello Reitor de EspazoCoop mantivo o 9 de xullo un encontro coa portavoz nacional do BNG, Ana Pontón, e o deputado Dani Pérez, co obxectivo de trasladar as principais necesidades e retos que enfronta o movemento cooperativo en Galicia.
A reunión, promovida pola propia organización cooperativa, serviu como espazo de diálogo para presentar as demandas do sector e explorar vías de colaboración que impulsen o desenvolvemento da economía social na comunidade galega.
Demandas e propostas do sector cooperativo
Durante o encontro, os representantes de EspazoCoop expuxeron aos deputados do BNG as principais preocupacións e reivindicacións do cooperativismo galego. Entre os aspectos abordados destacaron as dificultades burocráticas e administrativas que frenan o desenvolvemento cooperativo, así como a necesidade de maior apoio institucional ao sector.
A organización presentou tamén propostas concretas para mellorar o marco lexislativo que regula as cooperativas e subliñou a importancia de promover a economía social como alternativa de desenvolvemento territorial. Os representantes de EspazoCoop trasladaron a súa visión sobre o papel estratéxico que poden xogar as cooperativas no desenvolvemento socioeconómico de Galicia, especialmente no medio rural e nos sectores máis vulnerables
Ana Olveira, Presidenta de EspazoCoop, destacou que «o cooperativismo ten un papel fundamental no desenvolvemento socioeconómico de Galicia, especialmente nos territorios rurais onde as cooperativas son moitas veces o motor económico principal das comunidades«.
Tamén salientou que «as cooperativas galegas representan un modelo de empresa comprometida co territorio, que xera emprego de calidade e mantén a poboación nos seus lugares de orixe«. Ademais, sinalou que «o cooperativismo galego conta cunha longa tradición e experiencia que o converte nun sector estratéxico para afrontar os retos do futuro, desde a transición ecolóxica ata a dixitalización, sempre desde os valores da solidariedade e a participación democrática«.
Demandas ao Goberno do Estado
No ámbito estatal, EspazoCoop reclama a actualización do marco normativo ás realidades actuais do modelo cooperativo. Aínda que está en marcha unha reforma da lexislación cooperativa a través da proposta de Lei Integral de Economía Social, hai dous aspectos clave que quedaron fóra.
En primeiro lugar, a reforma da Lei Fiscal (Lei 20/1990, de 19 de decembro, sobre Réxime Fiscal das Cooperativas). O que hai 35 anos podía supoñer un incentivo para a creación de cooperativas, hoxe xa non resulta atractivo fiscalmente e, ademais, xera importantes inseguridades xurídicas fronte ás actuacións da Axencia Tributaria.
En segundo lugar, facilitar a transmisión de empresas ás persoas traballadoras, é dicir, impulsar a autoxestión empresarial. Aínda que existen avances neste eido, cómpre mellorar os mecanismos de relevo xeracional e de recuperación de empresas en perigo de peche. Destacan, por exemplo, as dificultades para capitalizar o desemprego, que dependen en exceso do criterio de cada oficina do SEPE.
Demandas en Galicia
En Galicia, malia os avances rexistrados nos últimos anos no ecosistema da economía social, aínda existen importantes marxes de mellora que foron trasladados aos representantes do BNG. Unha das máis importantes, a necesidade da reforma da Lei de Cooperativas de Galicia (Lei 5/1998, de 18 de decembro). Trátase dun reto lexislativo pendente. EspazoCoop reclama unha norma moderna, que non actúe como un corsé para o desenvolvemento do modelo, e que recoñeza o dinamismo e a autonomía do tecido cooperativo galego. As cooperativas, como outras fórmulas empresariais, non requiren dunha «titorización» ou actitude paternalista por parte da administración.
É preciso avanzar cara á desburocratización, sobre todo pero non só, das microcooperativas, dotar de personalidade xurídica ao Consello Galego de Cooperativas —como acontece noutras comunidades— e garantir que os fondos para a promoción e difusión do cooperativismo cheguen efectivamente ás cooperativas e cumpran o seu fin.
Outro aspecto fundamental é o impulso da contratación pública responsable. As cooperativas, polo seu poder de redistribución da riqueza, poden xerar un maior impacto se a Administración Pública aposta por este modelo empresarial. A compra pública responsable é unha política de alto impacto e baixo custo, que favorece a economía local e sostible.
Finalmente, EspazoCoop reclama a transversalidade da acción de goberno en relación coa economía social e o cooperativismo. As cooperativas operan en múltiples sectores, polo que todas as consellerías deben ter en conta este modelo nas súas políticas. Resulta especialmente relevante nos ámbitos da cultura, os coidados, ou da transición enerxética.
Sobre EspazoCoop
A Unión de Cooperativas Espazocoop é unha entidade multisectorial de carácter empresarial, configurada como asociación sen ánimo de lucro, de ámbito galego, integrada por cooperativas de distintas clases, inspirada nos principios cooperativos e os seus valores e que ten como obxectivo: agrupar, representar, impulsar, fomentar a intercooperación e defender os intereses das súas cooperativas socias e das persoas que as constitúen, así como a divulgación, fomento e consolidación do cooperativismo, como ferramenta de desenvolvemento socioeconómico, no marco da economía social e solidaria.
Deja tu comentario