EspazoCoop asiste á Feira das Ideas do programa Inicia: o talento emprendedor dos centros de FP da Coruña
EspazoCoop participou no desenvolvemento da Feira das Ideas do programa Inicia celebrada o 31 de marzo no Fórum Metropolitano e impulsada polo Concello da Coruña co que vén colaborando a Unión nos últimos anos.
Inicia é un programa que fomenta a cultura emprendedora nos centros de ensino e para o concello é importante amosar o talento e o traballo que levan a cabo os centros de Formación Profesional da cidade a través desta Feira.
Durante a mañá da Feira expuxéronse os 15 proxectos finalistas nunha mostra aberta que incluíu maquetas, materiais gráficos e outros recursos cos que deron a coñecer as súas ideas de negocio. Un comité avaliador supervisou todos os proxectos e decidiu que a mellor proposta foi Milgranda, seguido de Recipa e Plastictopía, todos eles do Rosalía Mera. O premio ao centro máis implicado foi para o Nebrija. Os centros participantes nesta xornada foron: a Grande Obra de Atocha, o Centro de Formación Profesional Nebrija, o IES Rosalía Mera e mais a Escola de Imaxe e Son.
Xa pola tarde, o auditorio do Fórum Metropolitano acolleu a Xornada Inicia, na que foron relatadas diferentes experiencias emprendedoras con representantes de iniciativas locais como Pablo Visos Varela (Sherlook), Enrique do Rosario (Sunwalk Records) ou o equipo de Skomb-by-Tex. A continuación, procedeuse á entrega dos Premios «Formación para emprender».
A Feira contou coa presenza da concelleira de Emprego, Comercio e Mercados, Diana Cabanas, e a representante da Unión de Cooperativas EspazoCoop, Patane García.
Deja tu comentario