Tres cooperativas socias de EspazoCoop recoñecidas nos premios do Día do Cooperativismo

A edición deste ano do Día do Cooperativismo deixou unha excelente pegada para tecido societario de EspazoCoop, cunha representación destacada de cooperativas vinculadas á nosa unión. Tres proxectos foron galardoados en diferentes modalidades, demostrando a diversidade e fortaleza das socias de EspazoCoop na nosa comunidade.

Illa Bufarda: Premio ao mellor proxecto cooperativo novo

A cooperativa Illa Bufarda foi distinguida co Premio ao mellor proxecto cooperativo novo, un recoñecemento que chega tras máis dunha década de traxectoria no sector audiovisual e da comunicación.

«Illa Bufarda nace no ano 2012 como un proxecto informal de Adriana e Sabela, froito da necesidade de traballar naquilo para o que nos formaramos», explican desde a cooperativa. Despois dunha evolución que as levou de traballadoras autónomas a constituír unha Sociedade Civil, e coa incorporación de Pilar en 2019, o verán de 2023 marcou o salto definitivo cara á forma cooperativa.

«O espírito cooperativo estivo sempre presente na maneira de traballar e na esencia da Illa Bufarda, polo que sentimos que, por fin, a nosa forma xurídica é coherente coa nosa maneira de entender e facer as cousas», sinalan.

Esta produtora audiovisual destaca pola súa versatilidade e ampla oferta de servizos arredor da comunicación, a formación e a imaxe, funcionando tanto como produtora con proxectos propios como axencia creativa. O equipo multidisciplinar permite ofrecer un abano de posibilidades visuais que van desde sesións de fotos ata plans de comunicación completos.

Un dos aspectos máis distintivos de Illa Bufarda é a súa achega ao ámbito cultural e social: «Moitas das producións da Illa Bufarda axudan á preservación e difusión da memoria colectiva, das linguas minorizadas, como o galego, e das expresións artísticas propias, visibilizando realidades que a miúdo fican fóra dos circuítos comerciais».

Para as socias, recibir este premio supón unha reafirmación do seu camiño: «Constituírmonos como cooperativa foi para nós a proxección laboral ideal desde os inicios. Non se deron as circunstancias ideais ata 11 anos despois, pero poder dalo con seguridade e que te recoñezan por iso, é un xeito de reafirmar que estamos facendo ben as cousas».

Rexenerando: Premio aos valores cooperativos

Na modalidade de Premio aos valores cooperativos, a cooperativa Rexenerando foi a galardoada, recoñecendo o seu compromiso cos principios fundamentais que definen o movemento cooperativo. Tras 11 anos de traxectoria, este recoñecemento avala a súa aposta decidida por facer dos valores cooperativos o eixo central da súa actividade.

«Sentimos que todos os valores que definen o cooperativismo nos moven, están presentes na nosa práctica», explican desde Rexenerando. Se teñen que salientar tres, destacan a axuda mutua, entendida como «un grupo de persoas que se xuntan para intentar provernos das mellores condicións posibles»; a igualdade, promovendo «un trato igualitario entre todas as persoas sabendo as diversidades que poden haber nunha cooperativa»; e a responsabilidade, asumindo «o noso traballo, cara fora, o impacto que teñe, compromiso coa comunidade».

A integración destes valores na práctica diaria da cooperativa maniféstase en múltiples aspectos: «Tendo moito constancia do contexto socioeconómico que nos movemos, cobrar salarios dignos, para nós e a nosa rede, condicións de estrés sostibles», salientan, poñendo o foco en que «o que estamos a facer está en contra das precariedade e condicións económicas actuais».

Para Rexenerando, o cooperativismo é unha ferramenta fundamental para un futuro máis sostible recoñecendo que «hai que aprender a usala para sacar todo o seu potencial e empregala ben para un mundo que non está preparado para ela».

Recibir este recoñecemento supón para a cooperativa «unha alegría, por recoñecer todo o que está na nosa memoria». Víveno como un recoñecemento «a algo no que nos esforzamos especialmente e moi singularmente no tema dos valores, que está na base de montar unha cooperativa e os servizos que ofrecemos como poñer un pouco os nosos saberes, a nosa forza de traballo, o noso esforzo e ilusión ao servizo de transformación social e de promover outro tipo de valores máis xustos e sostibles na sociedade».

Ademais, sinalan que «tamén o sentimos como un recoñecemento á nosa traxectoria despois de 11 anos de cooperativa, un recoñecemento a todo este traxecto, a ese camiño feito desta promoción e consolidación dos valores cara fóra e cara dentro». Para eles, este premio «nos impulsa a seguir nesta liña».

«Maruxía»: Accésit en proxectos empresariais cooperativos ao Colexio Mendiño

Na modalidade de Proxectos empresariais cooperativos, dirixida ao alumnado dos centros de formación profesional, o accésit foi para «Maruxía» da Sociedade Cooperativa Galega Mendiño. O equipo está formado por Aimar González, Ainhoa Magaz e Lara Rodríguez, estudantes de 2º curso do Ciclo Medio de Actividades Comerciais, baixo a dirección da docente Paola Bar.

«Maruxía consiste en poñer en contacto a persoas xoves dispostas a aprender o oficio da navegación a vela con persoas senior que están dispostas a compartir a súa experiencia, embarcación e experiencias con eles», explican os creadores do proxecto.

A idea xurdiu a partir dunha situación real: «Un amigo da nosa profesora amante do mar e da navegación a vela e agora que está xubilado sae só e non quere renunciar á navegación pero a súa familia preocúpase moito porque ten máis dificultades de movemento e hai riscos», contan.

Para o equipo, a fórmula cooperativa aporta ao proxecto «unha estrutura democrática e participativa, onde todos teñen voz e voto nas decisións» e «favorece a un reparto xusto de beneficios». Ademais, destacan que «permite acceder a subvencións e apoios públicos» e «fomenta valores coma a solidaridade e o compromiso colectivo».

«Tamén é un modelo resiliente fronte a crises económicas. En resumo, é unha opción sólida e equitativa para xóvenes que queren construir xuntos un proxecto sostible», sinalan.

En canto ao futuro de Maruxía, o equipo mantén os pés na terra: «Por agora non o temos claro, vamos a seguir cos nosos estudos e queremos estar centrados neles, xa que poñer en funcionamento un proxecto coma este precisa tempo e un compromiso que por agora non podemos adquirir».

Con todo, a súa experiencia co cooperativismo xa lles deixou unha lección clara. A outras persoas novas que estean pensando en emprender en cooperativa, díríanlles que «é a mellor forma de traballar xa que tomas decisións e ideas en conxunto, e tedes a mesma responsabilidade todos os que estades dentro da cooperativa». O galardón destaca a importancia da educación cooperativa como ferramenta clave para fomentar a innovación social e promover un emprendemento responsable e sostible.

Un recoñecemento ás cooperativas socias de EspazoCoop

Estes premios evidencian a vitalidade e diversidade do cooperativismo galego, desde cooperativas consolidadas que evolucionan cara a formas xurídicas máis coherentes cos seus valores, ata proxectos emerxentes que apostan pola innovación social e a conexión interxeracional.

A presenza destacada de cooperativas da Unión nestes galardóns reafirma o papel fundamental que o movemento cooperativo xoga na construción dunha economía máis social, sostible e participativa en Galicia.

—

*Imaxes: Rexenerando S. Coop. Galega e Illa Bufarda S. Coop. Galega