O Programa +COOP duplica os seus resultados 29 cooperativas constituídas en Galicia
As mulleres representan o 68% das persoas atendidas e o 62% dos empregos creados.
A Unión de Cooperativas EspazoCoop presentou hoxe os destacados resultados do programa +COOP correspondentes ao período 2024-2025, que evidencian un crecemento notable na creación de cooperativas en Galicia. O programa, que se desenvolve en colaboración coa Xunta de Galicia, Cepes e o Fondo Social Europeo Plus, alcanzou a constitución de 29 cooperativas, máis do dobre que o período anterior, xerando 64 postos de traballo mediante a fórmula do autoemprego colectivo.
O programa atendeu a 128 persoas interesadas en crear unha cooperativa, das cales o 68% foron mulleres, consolidando así o liderazgo feminino no ámbito cooperativo galego. Esta tendencia reflexa o crecente protagonismo das mulleres na economía social, especialmente nos sectores de servizos e coidados.
A distribución territorial mostra unha forte concentración na provincia de Pontevedra, que acolleu 16 das 29 cooperativas constituídas, seguida por A Coruña con 11 cooperativas e Ourense con 2. Do total de cooperativas creadas, 28 corresponden á modalidade de traballo asociado, das cales 3 son cooperativas xuvenís que contribúen á renovación xeracional do sector. Ademais, constituíuse 1 cooperativa de consumidoras e usuarias, ampliando así a diversidade do modelo cooperativo galego.
Impacto directo no emprego
O programa xerou 64 empregos directos, todos eles baixo a fórmula de persoas socias traballadoras, evidenciando o modelo participativo e democrático das cooperativas. Do total de empregos, 36 foron ocupados por mulleres e 28 por homes, mantendo a predominancia feminina que caracteriza o cooperativismo galego actual.
Lucía Mendoza, Directora Xerente de EspazoCoop, destacou o salto cualitativo do programa: «Os resultados de +COOP demostran a consolidación do modelo cooperativo como alternativa real de emprego en Galicia. A personalización do noso acompañamento e o forte compromiso das persoas promotoras permitiron case duplicar os resultados respecto ao período anterior, creando oportunidades de emprego sostible e de calidade«.
Metodoloxía integral de apoio
O programa +COOP mantén o seu enfoque integral de apoio ao cooperativismo, oferecendo servizos gratuítos que abarcan desde a orientación inicial ata a constitución formal da cooperativa. A metodoloxía inclúe:
- Orientación sobre o modelo cooperativo e as súas vantaxes
- Análise e validación da idea de negocio
- Elaboración de plans de empresa cooperativa
- Redacción de estatutos sociais adaptados a cada proxecto
- Asesoramento especializado en financiamento
- Xestión de axudas e subvencións
- Acompañamento na tramitación administrativa
Cooperativismo xuvenil: unha aposta de futuro
A incorporación de 3 cooperativas xuvenís, que xeraron 7 empregos para persoas menores de 30 anos, evidencia o potencial do cooperativismo como ferramenta de inserción laboral para a mocidade galega. Estas iniciativas contribúen tanto á fixación de poboación como ao desenvolvemento de novos modelos de negocio nos sectores emerxentes.
A xornada +COOP pechou coa presenza e intervención de Marta Mariño, Directora xeral de traballo autónomo e economía social, e de Celso Gándara, representante do Consello Reitor da Unión de Cooperativas EspazoCoop, que salientaron o papel de EspazoCoop no apoio á creación de cooperativas e do modelo cooperativo como un modelo económico trasformador que permite acceder ao emprego e poñer en marcha proxectos profesionais.
Deja tu comentario