Rede de aplicacións sociais
Cidadanía é unha empresa cooperativa constituída por un equipo multidisciplinar de profesionais do ámbito das ciencias sociais, pioneira en Galiza na integración de investigación, participación cidadá, planificación pública e xeración de capital social.
O equipo que o conforma, e os seus colaboradores, están comprometidos na maximización da utilidade social das investigacións e intervencións que realiza. O seu principio inspirador é a activación da participación, como metodoloxía innovadora de xestión e de mellora organizativa, como vía de desenvolvemento sociocomunitario, e como finalidade democrática de implicación e corresponsabilización da cidadanía nas decisións colectivas.
Cidadanía presta os seguintes servizos:
investigación social aplicada (estudos, análises, investigacións participadas, que buscan poñer en valor a dimensión activa das persoas e colectivos, involucrándoos tanto na diagnose de situacións, como no deseño e posta en marcha de accións orientadas ao cambio social…).
traballos de consultaría pública (deseño e implementación de políticas públicas, planificación estratéxica, ou avaliación de políticas).
Innovación democrática para mellorar a súa calidade, así orientan e apoian a democracia participativa como ámbito central de acción mediante a apertura de espazos deliberativos nos procesos de planificación pública, ou a vertebración da sociedade civil, para a activación dunha cidadanía activa e corresponsable.
servizos de mellora organizativa e cualificación das persoas, especialmente orientada á realidade das entidades do terceiro sector, ás empresas de economía social e ás organizacións do ámbito público.